אֵ~ל נְקָמוֹת ייי, אֵ~ל נְקָמוֹת הוֹפִיעַ; הִנָּשֵׂא שֹׁפֵט הָאָרֶץ, הָשֵׁב גְּמוּל עַל גֵּאִים; עַד מָתַי רְשָׁעִים, ייי, עַד מָתַי רְשָׁעִים יַעֲלֹזוּ; יַבִּיעוּ יְדַבְּרוּ עָתָק, יִתְאַמְּרוּ כׇּל פֹעֲלֵי אָוֶן; עַמְּךָ ייי יְדַכְּאוּ, וְנַחֲלָתְךָ יְעַנּוּ; אַלְמָנָה וְגֵר יַהֲרֹגוּ, וִיתוֹמִים יְרַצֵּחוּ; וַיֹּאמְרוּ לֹא יִרְאֶה יָ~הּ, וְלֹא יָבִין אֱ~לֹהֵי יַעֲקֹב; בִּינוּ בֹּעֲרִים בָּעָם, וּכְסִילִים מָתַי תַּשְׂכִּילוּ; הַנֹּטַע אֹזֶן הֲלֹא יִשְׁמָע, אִם יֹצֵר עַיִן הֲלֹא יַבִּיט; הֲיֹסֵר גּוֹיִם הֲלֹא יוֹכִיחַ, הַמְלַמֵּד אָדָם דָּעַת; ייי יֹדֵעַ מַחְשְׁבוֹת אָדָם כִּי הֵמָּה הָבֶל; אַשְׁרֵי הַגֶּבֶר אֲשֶׁר תְּיַסְּרֶנּוּ יָּ~הּ, וּמִתּוֹרָתְךָ תְלַמְּדֶנּוּ; לְהַשְׁקִיט לוֹ מִימֵי רָע, עַד יִכָּרֶה לָרָשָׁע שָׁחַת; כִּי לֹא יִטֹּשׁ ייי עַמּוֹ, וְנַחֲלָתוֹ לֹא יַעֲזֹב; כִּי עַד צֶדֶק יָשׁוּב מִשְׁפָּט, וְאַחֲרָיו כׇּל יִשְׁרֵי לֵב; מִי יָקוּם לִי עִם מְרֵעִים, מִי יִתְיַצֵּב לִי עִם פֹּעֲלֵי אָוֶן; לוּלֵי ייי עֶזְרָתָה לִּי, כִּמְעַט שָׁכְנָה דוּמָה נַפְשִׁי; אִם אָמַרְתִּי מָטָה רַגְלִי, חַסְדְּךָ ייי יִסְעָדֵנִי; בְּרֹב שַׂרְעַפַּי בְּקִרְבִּי, תַּנְחוּמֶיךָ יְשַׁעַשְׁעוּ נַפְשִׁי; הַיְחׇבְרְךָ כִּסֵּא הַוּוֹת, יֹצֵר עָמָל עֲלֵי חֹק; יָגוֹדּוּ עַל נֶפֶשׁ צַדִּיק, וְדָם נָקִי יַרְשִׁיעוּ; וַיְהִי ייי לִי לְמִשְׂגָּב, וֵא~לֹהַי לְצוּר מַחְסִי; וַיָּשֶׁב עֲלֵיהֶם אֶת אוֹנָם וּבְרָעָתָם יַצְמִיתֵם, יַצְמִיתֵם ייי אֱ~לֹהֵינוּ;
לְכוּ נְרַנְּנָה לַ ייי, נָרִיעָה לְצוּר יִשְׁעֵנוּ; נְקַדְּמָה פָנָיו בְּתוֹדָה, בִּזְמִרוֹת נָרִיעַ לוֹ; כִּי אֵ~ל גָּדוֹל ייי, וּמֶלֶךְ גָּדוֹל עַל כׇּל אֱלֹהִים;
