-----לדוד ייי אורי
([
לְדָוִד, ייי אוֹרִי וְיִשְׁעִי מִמִּי אִירָא, ייי מָעוֹז חַיַּי מִמִּי אֶפְחָד; בִּקְרֹב עָלַי מְרֵעִים לֶאֱכֹל אֶת בְּשָׂרִי, צָרַי וְאֹיְבַי לִי, הֵמָּה כָשְׁלוּ וְנָפָלוּ; אִם תַּחֲנֶה עָלַי מַחֲנֶה לֹא יִירָא לִבִּי, אִם תָּקוּם עָלַי מִלְחָמָה בְּזֹאת אֲנִי בוֹטֵחַ; אַחַת שָׁאַלְתִּי מֵאֵת ייי, אוֹתָהּ אֲבַקֵּשׁ, שִׁבְתִּי בְּבֵית ייי כׇּל יְמֵי חַיַּי, לַחֲזוֹת בְּנֹעַם ייי וּלְבַקֵּר בְּהֵיכָלוֹ; כִּי יִצְפְּנֵנִי בְּסֻכֹּה בְּיוֹם רָעָה יַסְתִּירֵנִי בְּסֵתֶר אָהֳלוֹ, בְּצוּר יְרוֹמְמֵנִי; וְעַתָּה יָרוּם רֹאשִׁי עַל אֹיְבַי סְבִיבוֹתַי, וְאֶזְבְּחָה בְאָהֳלוֹ זִבְחֵי תְרוּעָה, אָשִׁירָה וַאֲזַמְּרָה לַייי; שְׁמַע ייי קוֹלִי אֶקְרָא, וְחׇנֵּנִי וַעֲנֵנִי; לְךָ אָמַר לִבִּי בַּקְּשׁוּ פָנַי, אֶת פָּנֶיךָ ייי אֲבַקֵּשׁ; אַל תַּסְתֵּר פָּנֶיךָ מִמֶּנִּי, אַל תַּט בְּאַף עַבְדֶּךָ, עֶזְרָתִי הָיִיתָ, אַל תִּטְּשֵׁנִי וְאַל תַּעַזְבֵנִי אֱ~לֹהֵי יִשְׁעִי; כִּי אָבִי וְאִמִּי עֲזָבוּנִי, וַייי יַאַסְפֵנִי; הוֹרֵנִי ייי דַּרְכֶּךָ וּנְחֵנִי בְּאֹרַח מִישׁוֹר לְמַעַן שׁוֹרְרָי; אַל תִּתְּנֵנִי בְּנֶפֶשׁ צָרָי, כִּי קָמוּ בִי עֵדֵי שֶׁקֶר וִיפֵחַ חָמָס; לוּלֵא הֶאֱמַנְתִּי לִרְאוֹת בְּטוּב ייי בְּאֶרֶץ חַיִּים; קַוֵּה אֶל ייי, חֲזַק וְיַאֲמֵץ לִבֶּךָ, וְקַוֵּה אֶל ייי;
])

