(ז) בעמוד ענן ידבר אליהם שמרו עדתיו וחק נתן-למו:
(ח) ה' אלהינו אתה עניתם אל נשא היית להם ונקם על-עלילותם:
(ט) רוממו ה' אלהינו והשתחוו להר קדשו כי קדוש ה' אלהינו:

פרק ק'
(א) מזמור לתודה הריעו לה' כל-הארץ:
(ב) עבדו את-ה' בשמחה באו לפניו ברננה:
(ג) דעו כי ה' הוא אלהים הוא עשנו ולו אנחנו עמו וצאן מרעיתו:
(ד) באו שעריו בתודה חצרתיו בתהלה הודו לו ברכו שמו:
(ה) כי-טוב ה' לעולם חסדו ועד-דר ודר אמונתו:

פרק ק"א
(א) לדוד מזמור חסד-ומשפט אשירה לך ה' אזמרה:
(ב) אשכילה בדרך תמים מתי תבוא אלי אתהלך בתם-לבבי בקרב ביתי:
(ג) לא-אשית לנגד עיני דבר-בליעל עשה-סטים שנאתי לא ידבק בי:
(ד) לבב עקש יסור ממני רע לא אדע:
(ה) מלשני בסתר רעהו אותו אצמית גבה-עינים ורחב לבב אותו לא אוכל:
(ו) עיני בנאמני-ארץ לשבת עמדי הלך בדרך תמים הוא ישרתני:
(ז) לא-ישב בקרב ביתי עשה רמיה דבר שקרים לא-יכון לנגד עיני:
(ח) לבקרים אצמית כל-רשעי-ארץ להכרית מעיר-ה' כל-פעלי און:

פרק ק"ב
(א) תפלה לעני כי-יעטף ולפני ה' ישפך שיחו:
(ב) ה' שמעה תפלתי ושועתי אליך תבוא:
(ג) אל-תסתר פניך ממני ביום צר לי הטה-אלי אזנך ביום אקרא מהר ענני:
(ד) כי-כלו בעשן ימי ועצמותי כמוקד נחרו:
(ה) הוכה כעשב ויבש לבי כי שכחתי מאכל לחמי:
(ו) מקול אנחתי דבקה עצמי לבשרי:
(ז) דמיתי לקאת מדבר הייתי ככוס חרבות:
(ח) שקדתי ואהיה כצפור בודד על-גג:
(ט) כל-היום חרפוני אויבי מהוללי בי נשבעו:
(י) כי-אפר כלחם אכלתי ושקוי בבכי מסכתי:
(יא) מפני-זעמך וקצפך כי נשאתני ותשליכני:
(יב) ימי כצל נטוי ואני כעשב איבש:
(יג) ואתה ה' לעולם תשב וזכרך לדר ודר:
(יד) אתה תקום תרחם ציון כי-עת לחננה כי-בא מועד:
(טו) כי-רצו עבדיך את-אבניה ואת-עפרה יחננו:
(טז) וייראו גוים את-שם ה' וכל-מלכי הארץ את-כבודך:
(יז) כי-בנה ה' ציון נראה בכבודו:
(יח) פנה אל-תפלת הערער ולא-בזה את-תפלתם:
(יט) תכתב זאת לדור אחרון ועם נברא יהלל-יה:
(כ) כי-השקיף ממרום קדשו ה' משמים אל-ארץ הביט:
(כא) לשמע אנקת אסיר לפתח בני תמותה:
(כב) לספר בציון שם ה' ותהלתו בירושלם:
(כג) בהקבץ עמים יחדו וממלכות לעבד את-ה':
(כד) ענה בדרך כחי קצר ימי:
(כה) אמר אלי אל-תעלני בחצי ימי בדור דורים שנותיך:
(כו) לפנים הארץ יסדת ומעשה ידיך שמים:
(כז) המה יאבדו ואתה תעמד וכלם כבגד יבלו כלבוש תחליפם ויחלפו:
(כח) ואתה-הוא ושנותיך לא יתמו:
(כט) בני-עבדיך ישכנו וזרעם לפניך יכון:

פרק ק"ג
(א) לדוד ברכי נפשי את-ה' וכל-קרבי את-שם קדשו:
(ב) ברכי נפשי את-ה' ואל-תשכחי כל-גמוליו:
(ג) הסלח לכל-עונכי הרפא לכל-תחלואיכי:
(ד) הגואל משחת חייכי המעטרכי חסד ורחמים:
(ה) המשביע בטוב עדיך תתחדש כנשר נעוריכי:
(ו) עשה צדקות ה' ומשפטים לכל-עשוקים:
(ז) יודיע דרכיו למשה לבני ישראל עלילותיו:
(ח) רחום וחנון ה' ארך אפים ורב-חסד:
(ט) לא-לנצח יריב ולא לעולם יטור:
(י) לא כחטאינו עשה לנו ולא כעונתינו גמל עלינו:
(יא) כי כגבה שמים על-הארץ גבר חסדו על-יראיו:
(יב) כרחק מזרח ממערב הרחיק ממנו את-פשעינו:
(יג) כרחם אב על-בנים רחם ה' על-יראיו:
(יד) כי הוא ידע יצרנו זכור כי-עפר אנחנו:
(טו) אנוש כחציר ימיו כציץ השדה כן יציץ:
(טז) כי רוח עברה-בו ואיננו ולא-יכירנו עוד מקומו:
(יז) וחסד ה' מעולם ועד-עולם על-יראיו וצדקתו לבני בנים:
(יח) לשמרי בריתו ולזכרי פקדיו לעשותם:
(יט) ה' בשמים הכין כסאו ומלכותו בכל משלה:
(כ) ברכו ה' מלאכיו גברי כח עשי דברו לשמע בקול דברו:
(כא) ברכו ה' כל-צבאיו משרתיו עשי רצונו:
(כב) ברכו ה' כל-מעשיו בכל-מקמות ממשלתו ברכי נפשי את-ה':

פרק ק"ד
