(מח) זכר-אני מה-חלד על-מה-שוא בראת כל-בני-אדם:
(מט) מי גבר יחיה ולא יראה-מות ימלט נפשו מיד-שאול סלה:
(נ) איה חסדיך הראשנים אדני נשבעת לדוד באמונתך:
(נא) זכר אדני חרפת עבדיך שאתי בחיקי כל-רבים עמים:
(נב) אשר חרפו אויביך ה' אשר חרפו עקבות משיחך:
(נג) ברוך ה' לעולם אמן ואמן:

פרק צ'
(א) תפלה למשה איש-האלהים אדני מעון אתה היית לנו בדר ודר:
(ב) בטרם הרים ילדו ותחולל ארץ ותבל ומעולם עד-עולם אתה אל:
(ג) תשב אנוש עד-דכא ותאמר שובו בני-אדם:
(ד) כי אלף שנים בעיניך כיום אתמול כי יעבר ואשמורה בלילה:
(ה) זרמתם שנה יהיו בבקר כחציר יחלף:
(ו) בבקר יציץ וחלף לערב ימולל ויבש:
(ז) כי-כלינו באפך ובחמתך נבהלנו:
(ח) שתה עונתינו לנגדך עלמנו למאור פניך:
(ט) כי כל-ימינו פנו בעברתך כלינו שנינו כמו-הגה:
(י) ימי שנותינו בהם שבעים שנה ואם בגבורת שמונים שנה ורהבם עמל ואון כי גז חיש ונעפה:
(יא) מי-יודע עז אפך וכיראתך עברתך:
(יב) למנות ימינו כן הודע ונבא לבב חכמה:
(יג) שובה ה' עד-מתי והנחם על-עבדיך:
(יד) שבענו בבקר חסדך ונרננה ונשמחה בכל-ימינו:
(טו) שמחנו כימות עניתנו שנות ראינו רעה:
(טז) יראה אל-עבדיך פעלך והדרך על-בניהם:
(יז) ויהי נעם אדני אלהינו עלינו ומעשה ידינו כוננה עלינו ומעשה ידינו כוננהו:

פרק צ"א
(א) ישב בסתר עליון בצל שדי יתלונן:
(ב) אמר לה' מחסי ומצודתי אלהי אבטח-בו:
(ג) כי הוא יצילך מפח יקוש מדבר הוות:
(ד) באברתו יסך לך ותחת כנפיו תחסה צנה וסחרה אמתו:
(ה) לא-תירא מפחד לילה מחץ יעוף יומם:
(ו) מדבר באפל יהלך מקטב ישוד צהרים:
(ז) יפל מצדך אלף ורבבה מימינך אליך לא יגש:
(ח) רק בעיניך תביט ושלמת רשעים תראה:
(ט) כי-אתה ה' מחסי עליון שמת מעונך:
(י) לא-תאנה אליך רעה ונגע לא-יקרב באהלך:
(יא) כי מלאכיו יצוה-לך לשמרך בכל-דרכיך:
(יב) על-כפים ישאונך פן-תגף באבן רגלך:
(יג) על-שחל ופתן תדרך תרמס כפיר ותנין:
(יד) כי בי חשק ואפלטהו אשגבהו כי-ידע שמי:
(טו) יקראני ואענהו עמו-אנכי בצרה אחלצהו ואכבדהו:
(טז) ארך ימים אשביעהו ואראהו בישועתי:

פרק צ"ב
(א) מזמור שיר ליום השבת:
(ב) טוב להדות לה' ולזמר לשמך עליון:
(ג) להגיד בבקר חסדך ואמונתך בלילות:
(ד) עלי-עשור ועלי-נבל עלי הגיון בכנור:
(ה) כי שמחתני ה' בפעלך במעשי ידיך ארנן:
(ו) מה-גדלו מעשיך ה' מאד עמקו מחשבתיך:
(ז) איש בער לא ידע וכסיל לא-יבין את-זאת:
(ח) בפרח רשעים כמו עשב ויציצו כל-פעלי און להשמדם עדי-עד:
(ט) ואתה מרום לעלם ה':
(י) כי הנה איביך ה' כי-הנה איביך יאבדו יתפרדו כל-פעלי און:
(יא) ותרם כראים קרני בלתי בשמן רענן:
(יב) ותבט עיני בשורי בקמים עלי מרעים תשמענה אזני:
(יג) צדיק כתמר יפרח כארז בלבנון ישגה:
(יד) שתולים בבית ה' בחצרות אלהינו יפריחו:
(טו) עוד ינובון בשיבה דשנים ורעננים יהיו:
(טז) להגיד כי-ישר ה' צורי ולא-עולתה בו:

פרק צ"ג
(א) ה' מלך גאות לבש לבש ה' עז התאזר אף-תכון תבל בל-תמוט:
(ב) נכון כסאך מאז מעולם אתה:
(ג) נשאו נהרות ה' נשאו נהרות קולם ישאו נהרות דכים:
(ד) מקלות מים רבים אדירים משברי-ים אדיר במרום ה':
(ה) עדתיך נאמנו מאד לביתך נאוה-קדש ה' לארך ימים:

פרק צ"ד
(א) אל-נקמות ה' אל נקמות הופיע:
(ב) הנשא שפט הארץ השב גמול על-גאים:
(ג) עד-מתי רשעים ה' עד-מתי רשעים יעלזו:
(ד) יביעו ידברו עתק יתאמרו כל-פעלי און:
(ה) עמך ה' ידכאו ונחלתך יענו:
(ו) אלמנה וגר יהרגו ויתומים ירצחו:
(ז) ויאמרו לא יראה-יה ולא יבין אלהי יעקב:
(ח) בינו בערים בעם וכסילים מתי תשכילו:
(ט) הנטע אזן הלא ישמע אם-יצר עין הלא יביט:
