(ז) אכן כאדם תמותון וכאחד השרים תפלו:
(ח) קומה אלהים שפטה הארץ כי-אתה תנחל בכל-הגוים:

פרק פ"ג
(א) שיר מזמור לאסף:
(ב) אלהים אל-דמי-לך אל-תחרש ואל-תשקט אל:
(ג) כי-הנה אויביך יהמיון ומשנאיך נשאו ראש:
(ד) על-עמך יערימו סוד ויתיעצו על-צפוניך:
(ה) אמרו לכו ונכחידם מגוי ולא-יזכר שם-ישראל עוד:
(ו) כי נועצו לב יחדו עליך ברית יכרתו:
(ז) אהלי אדום וישמעאלים מואב והגרים:
(ח) גבל ועמון ועמלק פלשת עם-ישבי צור:
(ט) גם-אשור נלוה עמם היו זרוע לבני-לוט סלה:
(י) עשה-להם כמדין כסיסרא כיבין בנחל קישון:
(יא) נשמדו בעין-דאר היו דמן לאדמה:
(יב) שיתמו נדיבמו כערב וכזאב וכזבח וכצלמנע כל-נסיכמו:
(יג) אשר אמרו נירשה לנו את נאות אלהים:
(יד) אלהי שיתמו כגלגל כקש לפני-רוח:
(טו) כאש תבער-יער וכלהבה תלהט הרים:
(טז) כן תרדפם בסערך ובסופתך תבהלם:
(יז) מלא פניהם קלון ויבקשו שמך ה':
(יח) יבשו ויבהלו עדי-עד ויחפרו ויאבדו:
(יט) וידעו כי-אתה שמך ה' לבדך עליון על-כל-הארץ:

פרק פ"ד
(א) למנצח על-הגתית לבני-קרח מזמור:
(ב) מה-ידידות משכנותיך ה' צבאות:
(ג) נכספה וגם-כלתה נפשי לחצרות ה' לבי ובשרי ירננו אל-אל חי:
(ד) גם-צפור מצאה בית ודרור קן לה אשר-שתה אפרחיה את-מזבחותיך ה' צבאות מלכי ואלהי:
(ה) אשרי יושבי ביתך עוד יהללוך סלה:
(ו) אשרי אדם עוז לו-בך מסלות בלבבם:
(ז) עברי בעמק הבכא מעין ישיתוהו גם-ברכות יעטה מורה:
(ח) ילכו מחיל אל-חיל יראה אל-אלהים בציון:
(ט) ה' אלהים צבאות שמעה תפלתי האזינה אלהי יעקב סלה:
(י) מגננו ראה אלהים והבט פני משיחך:
(יא) כי טוב-יום בחצריך מאלף בחרתי הסתופף בבית אלהי מדור באהלי-רשע:
(יב) כי שמש ומגן ה' אלהים חן וכבוד יתן ה' לא-ימנע טוב להלכים בתמים:
(יג) ה' צבאות אשרי אדם בטח בך:

פרק פ"ה
(א) למנצח לבני-קרח מזמור:
(ב) רצית ה' ארצך שבת שבית יעקב:
(ג) נשאת עון עמך כסית כל-חטאתם סלה:
(ד) אספת כל-עברתך השיבות מחרון אפך:
(ה) שובנו אלהי ישענו והפר כעסך עמנו:
(ו) הלעולם תאנף-בנו תמשך אפך לדר ודר:
(ז) הלא אתה תשוב תחיינו ועמך ישמחו-בך:
(ח) הראנו ה' חסדך וישעך תתן-לנו:
(ט) אשמעה מה-ידבר האל ה' כי-ידבר שלום אל-עמו ואל-חסידיו ואל-ישובו לכסלה:
(י) אך קרוב ליראיו ישעו לשכן כבוד בארצנו:
(יא) חסד-ואמת נפגשו צדק ושלום נשקו:
(יב) אמת מארץ תצמח וצדק משמים נשקף:
(יג) גם-ה' יתן הטוב וארצנו תתן יבולה:
(יד) צדק לפניו יהלך וישם לדרך פעמיו:

פרק פ"ו
(א) תפלה לדוד הטה ה' אזנך ענני כי-עני ואביון אני:
(ב) שמרה נפשי כי-חסיד אני הושע עבדך אתה אלהי הבוטח אליך:
(ג) חנני אדני כי-אליך אקרא כל-היום:
(ד) שמח נפש עבדך כי-אליך אדני נפשי אשא:
(ה) כי-אתה אדני טוב וסלח ורב-חסד לכל-קראיך:
(ו) האזינה ה' תפלתי והקשיבה בקול תחנונותי:
(ז) ביום צרתי אקראך כי תענני:
(ח) אין-כמוך באלהים אדני ואין כמעשיך:
(ט) כל-גוים אשר עשית יבואו וישתחוו לפניך אדני ויכבדו לשמך:
(י) כי-גדול אתה ועשה נפלאות אתה אלהים לבדך:
(יא) הורני ה' דרכך אהלך באמתך יחד לבבי ליראה שמך:
(יב) אודך אדני אלהי בכל-לבבי ואכבדה שמך לעולם:
(יג) כי-חסדך גדול עלי והצלת נפשי משאול תחתיה:
(יד) אלהים זדים קמו עלי ועדת עריצים בקשו נפשי ולא שמוך לנגדם:
(טו) ואתה אדני אל-רחום וחנון ארך אפים ורב-חסד ואמת:
(טז) פנה אלי וחנני תנה-עזך לעבדך והושיעה לבן-אמתך:
(יז) עשה-עמי אות לטובה ויראו שנאי ויבשו כי-אתה ה' עזרתני ונחמתני:

פרק פ"ז
(א) לבני-קרח מזמור שיר יסודתו בהררי-קדש:
(ב) אהב ה' שערי ציון מכל משכנות יעקב:
(ג) נכבדות מדבר בך עיר האלהים סלה:
