(כו) כלה שארי ולבבי צור-לבבי וחלקי אלהים לעולם:
(כז) כי-הנה רחקיך יאבדו הצמתה כל-זונה ממך:
(כח) ואני קרבת אלהים לי טוב שתי באדני ה' מחסי לספר כל-מלאכותיך:

פרק ע"ד
(א) משכיל לאסף למה אלהים זנחת לנצח יעשן אפך בצאן מרעיתך:
(ב) זכר עדתך קנית קדם גאלת שבט נחלתך הר-ציון זה שכנת בו:
(ג) הרימה פעמיך למשאות נצח כל-הרע אויב בקדש:
(ד) שאגו צרריך בקרב מועדך שמו אותתם אתות:
(ה) יודע כמביא למעלה בסבך-עץ קרדמות:
(ו) ועתה פתוחיה יחד בכשיל וכילפות יהלמון:
(ז) שלחו באש מקדשך לארץ חללו משכן-שמך:
(ח) אמרו בלבם נינם יחד שרפו כל-מועדי-אל בארץ:
(ט) אתותינו לא-ראינו אין-עוד נביא ולא-אתנו יודע עד-מה:
(י) עד-מתי אלהים יחרף צר ינאץ אויב שמך לנצח:
(יא) למה תשיב ידך וימינך מקרב חיקך כלה:
(יב) ואלהים מלכי מקדם פעל ישועות בקרב הארץ:
(יג) אתה פוררת בעזך ים שברת ראשי תנינים על-המים:
(יד) אתה רצצת ראשי לויתן תתננו מאכל לעם לציים:
(טו) אתה בקעת מעין ונחל אתה הובשת נהרות איתן:
(טז) לך יום אף-לך לילה אתה הכינות מאור ושמש:
(יז) אתה הצבת כל-גבולות ארץ קיץ וחרף אתה יצרתם:
(יח) זכר-זאת אויב חרף ה' ועם-נבל נאצו שמך:
(יט) אל-תתן לחית נפש תורך חית ענייך אל-תשכח לנצח:
(כ) הבט לברית כי-מלאו מחשכי-ארץ נאות חמס:
(כא) אל-ישב דך נכלם עני ואביון יהללו שמך:
(כב) קומה אלהים ריבה ריבך זכר חרפתך מני-נבל כל-היום:
(כג) אל-תשכח קול צרריך שאון קמיך עלה תמיד:

פרק ע"ה
(א) למנצח אל-תשחת מזמור לאסף שיר:
(ב) הודינו לך אלהים הודינו וקרוב שמך ספרו נפלאותיך:
(ג) כי-אקח מועד אני מישרים אשפט:
(ד) נמגים-ארץ וכל-ישביה אנכי תכנתי עמודיה סלה:
(ה) אמרתי להוללים אל-תהלו ולרשעים אל-תרימו קרן:
(ו) אל-תרימו למרום קרנכם תדברו בצואר עתק:
(ז) כי לא ממוצא וממערב ולא ממדבר הרים:
(ח) כי-אלהים שפט זה ישפיל וזה ירים:
(ט) כי כוס ביד-ה' ויין חמר מלא מסך ויגר מזה אך-שמריה ימצו ישתו כל רשעי-ארץ:
(י) ואני אגיד לעלם אזמרה לאלהי יעקב:
(יא) וכל-קרני רשעים אגדע תרוממנה קרנות צדיק:

פרק ע"ו
(א) למנצח בנגינת מזמור לאסף שיר:
(ב) נודע ביהודה אלהים בישראל גדול שמו:
(ג) ויהי בשלם סוכו ומעונתו בציון:
(ד) שמה שבר רשפי-קשת מגן וחרב ומלחמה סלה:
(ה) נאור אתה אדיר מהררי-טרף:
(ו) אשתוללו אבירי לב נמו שנתם ולא-מצאו כל-אנשי-חיל ידיהם:
(ז) מגערתך אלהי יעקב נרדם ורכב וסוס:
(ח) אתה נורא אתה ומי-יעמד לפניך מאז אפך:
(ט) משמים השמעת דין ארץ יראה ושקטה:
(י) בקום-למשפט אלהים להושיע כל-ענוי-ארץ סלה:
(יא) כי-חמת אדם תודך שארית חמת תחגר:
(יב) נדרו ושלמו לה' אלהיכם כל-סביביו יבילו שי למורא:
(יג) יבצר רוח נגידים נורא למלכי-ארץ:

פרק ע"ז
(א) למנצח על-ידותון לאסף מזמור:
(ב) קולי אל-אלהים ואצעקה קולי אל-אלהים והאזין אלי:
(ג) ביום צרתי אדני דרשתי ידי לילה נגרה ולא תפוג מאנה הנחם נפשי:
(ד) אזכרה אלהים ואהמיה אשיחה ותתעטף רוחי סלה:
(ה) אחזת שמרות עיני נפעמתי ולא אדבר:
(ו) חשבתי ימים מקדם שנות עולמים:
(ז) אזכרה נגינתי בלילה עם-לבבי אשיחה ויחפש רוחי:
(ח) הלעולמים יזנח אדני ולא-יסיף לרצות עוד:
(ט) האפס לנצח חסדו גמר אומר לדר ודר:
(י) השכח חנות אל אם-קפץ באף רחמיו סלה:
(יא) ואמר חלותי היא שנות ימין עליון:
(יב) אזכור מעללי-יה כי-אזכרה מקדם פלאך:
(יג) והגיתי בכל-פעלך ובעלילותיך אשיחה:
(יד) אלהים בקדש דרכך מי-אל גדול כאלהים:
(טו) אתה האל עשה פלא הודעת בעמים עזך:
(טז) גאלת בזרוע עמך בני-יעקב ויוסף סלה:
(יז) ראוך מים אלהים ראוך מים יחילו אף ירגזו תהמות:
