(יט) עלית למרום שבית שבי לקחת מתנות באדם ואף סוררים לשכן יה אלהים:
(כ) ברוך אדני יום יום יעמס לנו האל ישועתנו סלה:
(כא) האל לנו אל למושעות ולה' אדני למות תוצאות:
(כב) אך-אלהים ימחץ ראש איביו קדקד שער מתהלך באשמיו:
(כג) אמר אדני מבשן אשיב אשיב ממצלות ים:
(כד) למען תמחץ רגלך בדם לשון כלביך מאויבים מנהו:
(כה) ראו הליכותיך אלהים הליכות אלי מלכי בקדש:
(כו) קדמו שרים אחר נגנים בתוך עלמות תופפות:
(כז) במקהלות ברכו אלהים אדני ממקור ישראל:
(כח) שם בנימן צעיר רדם שרי יהודה רגמתם שרי זבלון שרי נפתלי:
(כט) צוה אלהיך עזך עוזה אלהים זו פעלת לנו:
(ל) מהיכלך על-ירושלם לך יובילו מלכים שי:
(לא) גער חית קנה עדת אבירים בעגלי עמים מתרפס ברצי-כסף בזר עמים קרבות יחפצו:
(לב) יאתיו חשמנים מני מצרים כוש תריץ ידיו לאלהים:
(לג) ממלכות הארץ שירו לאלהים זמרו אדני סלה:
(לד) לרכב בשמי שמי-קדם הן-יתן בקולו קול עז:
(לה) תנו עז לאלהים על-ישראל גאותו ועזו בשחקים:
(לו) נורא אלהים ממקדשיך אל ישראל הוא נתן עז ותעצמות לעם ברוך אלהים:

פרק ס"ט
(א) למנצח על-שושנים לדוד:
(ב) הושיעני אלהים כי באו מים עד-נפש:
(ג) טבעתי ביון מצולה ואין מעמד באתי במעמקי-מים ושבלת שטפתני:
(ד) יגעתי בקראי נחר גרוני כלו עיני מיחל לאלהי:
(ה) רבו משערות ראשי שנאי חנם עצמו מצמיתי איבי שקר אשר לא-גזלתי אז אשיב:
(ו) אלהים אתה ידעת לאולתי ואשמותי ממך לא-נכחדו:
(ז) אל-יבשו בי קויך אדני ה' צבאות אל-יכלמו בי מבקשיך אלהי ישראל:
(ח) כי-עליך נשאתי חרפה כסתה כלמה פני:
(ט) מוזר הייתי לאחי ונכרי לבני אמי:
(י) כי-קנאת ביתך אכלתני וחרפות חורפיך נפלו עלי:
(יא) ואבכה בצום נפשי ותהי לחרפות לי:
(יב) ואתנה לבושי שק ואהי להם למשל:
(יג) ישיחו בי ישבי שער ונגינות שותי שכר:
(יד) ואני תפלתי לך ה' עת רצון אלהים ברב-חסדך ענני באמת ישעך:
(טו) הצילני מטיט ואל-אטבעה אנצלה משנאי וממעמקי-מים:
(טז) אל-תשטפני שבלת מים ואל-תבלעני מצולה ואל-תאטר עלי באר פיה:
(יז) ענני ה' כי-טוב חסדך כרב רחמיך פנה אלי:
(יח) ואל-תסתר פניך מעבדך כי-צר-לי מהר ענני:
(יט) קרבה אל-נפשי גאלה למען איבי פדני:
(כ) אתה ידעת חרפתי ובשתי וכלמתי נגדך כל-צוררי:
(כא) חרפה שברה לבי ואנושה ואקוה לנוד ואין ולמנחמים ולא מצאתי:
(כב) ויתנו בברותי ראש ולצמאי ישקוני חמץ:
(כג) יהי שלחנם לפניהם לפח ולשלומים למוקש:
(כד) תחשכנה עיניהם מראות ומתניהם תמיד המעד:
(כה) שפך-עליהם זעמך וחרון אפך ישיגם:
(כו) תהי-טירתם נשמה באהליהם אל-יהי ישב:
(כז) כי-אתה אשר-הכית רדפו ואל-מכאוב חלליך יספרו:
(כח) תנה-עון על-עונם ואל-יבאו בצדקתך:
(כט) ימחו מספר חיים ועם-צדיקים אל-יכתבו:
(ל) ואני עני וכואב ישועתך אלהים תשגבני:
(לא) אהללה שם-אלהים בשיר ואגדלנו בתודה:
(לב) ותיטב לה' משור פר מקרן מפריס:
(לג) ראו ענוים ישמחו דרשי אלהים ויחי לבבכם:
(לד) כי-שמע אל-אביונים ה' ואת-אסיריו לא בזה:
(לה) יהללוהו שמים וארץ ימים וכל-רמש בם:
(לו) כי אלהים יושיע ציון ויבנה ערי יהודה וישבו שם וירשוה:
(לז) וזרע-עבדיו ינחלוה ואהבי שמו ישכנו-בה:

פרק ע'
(א) למנצח לדוד להזכיר:
(ב) אלהים להצילני ה' לעזרתי חושה:
(ג) יבשו ויחפרו מבקשי נפשי יסגו אחור ויכלמו חפצי רעתי:
(ד) ישובו על-עקב בשתם האמרים האח האח:
(ה) ישישו וישמחו בך כל-מבקשיך ויאמרו תמיד יגדל אלהים אהבי ישועתך:
(ו) ואני עני ואביון אלהים חושה לי עזרי ומפלטי אתה ה' אל-תאחר:

פרק ע"א
(א) בך-ה' חסיתי אל-אבושה לעולם:
(ב) בצדקתך תצילני ותפלטני הטה-אלי אזנך והושיעני:
