(י) בלע אדני פלג לשונם כי-ראיתי חמס וריב בעיר:
(יא) יומם ולילה יסובבה על-חומתיה ואון ועמל בקרבה:
(יב) הוות בקרבה ולא-ימיש מרחבה תוך ומרמה:
(יג) כי לא-אויב יחרפני ואשא לא-משנאי עלי הגדיל ואסתר ממנו:
(יד) ואתה אנוש כערכי אלופי ומידעי:
(טו) אשר יחדו נמתיק סוד בבית אלהים נהלך ברגש:
(טז) ישי מות עלימו ירדו שאול חיים כי-רעות במגורם בקרבם:
(יז) אני אל-אלהים אקרא וה' יושיעני:
(יח) ערב ובקר וצהרים אשיחה ואהמה וישמע קולי:
(יט) פדה בשלום נפשי מקרב-לי כי-ברבים היו עמדי:
(כ) ישמע אל ויענם וישב קדם סלה אשר אין חליפות למו ולא יראו אלהים:
(כא) שלח ידיו בשלמיו חלל בריתו:
(כב) חלקו מחמאת פיו וקרב לבו רכו דבריו משמן והמה פתחות:
(כג) השלך על-ה' יהבך והוא יכלכלך לא-יתן לעולם מוט לצדיק:
(כד) ואתה אלהים תורדם לבאר שחת אנשי דמים ומרמה לא-יחצו ימיהם ואני אבטח-בך:

פרק נ"ו
(א) למנצח על-יונת אלם רחקים לדוד מכתם באחז אותו פלשתים בגת:
(ב) חנני אלהים כי-שאפני אנוש כל-היום לחם ילחצני:
(ג) שאפו שוררי כל-היום כי-רבים לחמים לי מרום:
(ד) יום אירא אני אליך אבטח:
(ה) באלהים אהלל דברו באלהים בטחתי לא אירא מה-יעשה בשר לי:
(ו) כל-היום דברי יעצבו עלי כל-מחשבתם לרע:
(ז) יגורו יצפונו המה עקבי ישמרו כאשר קוו נפשי:
(ח) על-און פלט-למו באף עמים הורד אלהים:
(ט) נדי ספרתה אתה שימה דמעתי בנאדך הלא בספרתך:
(י) אז ישובו אויבי אחור ביום אקרא זה ידעתי כי-אלהים לי:
(יא) באלהים אהלל דבר בה' אהלל דבר:
(יב) באלהים בטחתי לא אירא מה-יעשה אדם לי:
(יג) עלי אלהים נדריך אשלם תודות לך:
(יד) כי הצלת נפשי ממות הלא רגלי מדחי להתהלך לפני אלהים באור החיים:

פרק נ"ז
(א) למנצח אל-תשחת לדוד מכתם בברחו מפני-שאול במערה:
(ב) חנני אלהים חנני כי בך חסיה נפשי ובצל-כנפיך אחסה עד יעבר הוות:
(ג) אקרא לאלהים עליון לאל גמר עלי:
(ד) ישלח משמים ויושיעני חרף שאפי סלה ישלח אלהים חסדו ואמתו:
(ה) נפשי בתוך לבאם אשכבה להטים בני-אדם שניהם חנית וחצים ולשונם חרב חדה:
(ו) רומה על-השמים אלהים על כל-הארץ כבודך:
(ז) רשת הכינו לפעמי כפף נפשי כרו לפני שיחה נפלו בתוכה סלה:
(ח) נכון לבי אלהים נכון לבי אשירה ואזמרה:
(ט) עורה כבודי עורה הנבל וכנור אעירה שחר:
(י) אודך בעמים אדני אזמרך בלאמים:
(יא) כי-גדל עד-שמים חסדך ועד-שחקים אמתך:
(יב) רומה על-שמים אלהים על כל-הארץ כבודך:

פרק נ"ח
(א) למנצח אל-תשחת לדוד מכתם:
(ב) האמנם אלם צדק תדברון מישרים תשפטו בני אדם:
(ג) אף בלב עולת תפעלון בארץ חמס ידיכם תפלסון:
(ד) זרו רשעים מרחם תעו מבטן דברי כזב:
(ה) חמת-למו כדמות חמת-נחש כמו-פתן חרש יאטם אזנו:
(ו) אשר לא-ישמע לקול מלחשים חובר חברים מחכם:
(ז) אלהים הרס-שנימו בפימו מלתעות כפירים נתוץ ה':
(ח) ימאסו כמו-מים יתהלכו-למו ידרך חציו כמו יתמללו:
(ט) כמו שבלול תמס יהלך נפל אשת בל-חזו שמש:
(י) בטרם יבינו סירתיכם אטד כמו-חי כמו-חרון ישערנו:
(יא) ישמח צדיק כי-חזה נקם פעמיו ירחץ בדם הרשע:
(יב) ויאמר אדם אך-פרי לצדיק אך יש אלהים שפטים בארץ:

פרק נ"ט
(א) למנצח אל-תשחת לדוד מכתם בשלח שאול וישמרו את-הבית להמיתו:
(ב) הצילני מאיבי אלהי ממתקוממי תשגבני:
(ג) הצילני מפעלי און ומאנשי דמים הושיעני:
(ד) כי הנה ארבו לנפשי יגורו עלי עזים לא-פשעי ולא-חטאתי ה':
(ה) בלי-עון ירצון ויכוננו עורה לקראתי וראה:
(ו) ואתה ה' אלהים צבאות אלהי ישראל הקיצה לפקד כל-הגוים אל-תחן כל-בגדי און סלה:
(ז) ישובו לערב יהמו ככלב ויסובבו עיר:
(ח) הנה יביעון בפיהם חרבות בשפתותיהם כי מי שמע:
