(יז) כי-אמרתי פן-ישמחו-לי במוט רגלי עלי הגדילו:
(יח) כי אני לצלע נכון ומכאובי נגדי תמיד:
(יט) כי-עוני אגיד אדאג מחטאתי:
(כ) ואיבי חיים עצמו ורבו שנאי שקר:
(כא) ומשלמי רעה תחת טובה ישטנוני תחת רדפי-טוב:
(כב) אל-תעזבני ה' אלהי אל-תרחק ממני:
(כג) חושה לעזרתי אדני תשועתי:

פרק ל"ט
(א) למנצח לידותון מזמור לדוד:
(ב) אמרתי אשמרה דרכי מחטוא בלשוני אשמרה לפי מחסום בעד רשע לנגדי:
(ג) נאלמתי דומיה החשיתי מטוב וכאבי נעכר:
(ד) חם-לבי בקרבי בהגיגי תבער-אש דברתי בלשוני:
(ה) הודיעני ה' קצי ומדת ימי מה-היא אדעה מה-חדל אני:
(ו) הנה טפחות נתתה ימי וחלדי כאין נגדך אך-כל-הבל כל-אדם נצב סלה:
(ז) אך-בצלם יתהלך-איש אך-הבל יהמיון יצבר ולא-ידע מי-אספם:
(ח) ועתה מה-קויתי אדני תוחלתי לך היא:
(ט) מכל-פשעי הצילני חרפת נבל אל-תשימני:
(י) נאלמתי לא אפתח-פי כי אתה עשית:
(יא) הסר מעלי נגעך מתגרת ידך אני כליתי:
(יב) בתוכחות על-עון יסרת איש ותמס כעש חמודו אך הבל כל-אדם סלה:
(יג) שמעה-תפלתי ה' ושועתי האזינה אל-דמעתי אל-תחרש כי גר אנכי עמך תושב ככל-אבותי:
(יד) השע ממני ואבליגה בטרם אלך ואינני:

פרק מ'
(א) למנצח לדוד מזמור:
(ב) קוה קויתי ה' ויט אלי וישמע שועתי:
(ג) ויעלני מבור שאון מטיט היון ויקם על-סלע רגלי כונן אשרי:
(ד) ויתן בפי שיר חדש תהלה לאלהינו יראו רבים וייראו ויבטחו בה':
(ה) אשרי הגבר אשר-שם ה' מבטחו ולא-פנה אל-רהבים ושטי כזב:
(ו) רבות עשית אתה ה' אלהי נפלאתיך ומחשבתיך אלינו אין ערך אליך אגידה ואדברה עצמו מספר:
(ז) זבח ומנחה לא-חפצת אזנים כרית לי עולה וחטאה לא שאלת:
(ח) אז אמרתי הנה-באתי במגלת-ספר כתוב עלי:
(ט) לעשות רצונך אלהי חפצתי ותורתך בתוך מעי:
(י) בשרתי צדק בקהל רב הנה שפתי לא אכלא ה' אתה ידעת:
(יא) צדקתך לא-כסיתי בתוך לבי אמונתך ותשועתך אמרתי לא-כחדתי חסדך ואמתך לקהל רב:
(יב) אתה ה' לא-תכלא רחמיך ממני חסדך ואמתך תמיד יצרוני:
(יג) כי אפפו עלי רעות עד-אין מספר השיגוני עונתי ולא-יכלתי לראות עצמו משערות ראשי ולבי עזבני:
(יד) רצה-ה' להצילני ה' לעזרתי חושה:
(טו) יבשו ויחפרו יחד מבקשי נפשי לספותה יסגו אחור ויכלמו חפצי רעתי:
(טז) ישמו על-עקב בשתם האמרים לי האח האח:
(יז) ישישו וישמחו בך כל-מבקשיך יאמרו תמיד יגדל ה' אהבי תשועתך:
(יח) ואני עני ואביון אדני יחשב לי עזרתי ומפלטי אתה אלהי אל-תאחר:

פרק מ"א
(א) למנצח מזמור לדוד:
(ב) אשרי משכיל אל-דל ביום רעה ימלטהו ה':
(ג) ה' ישמרהו ויחיהו ואשר בארץ ואל-תתנהו בנפש איביו:
(ד) ה' יסעדנו על-ערש דוי כל-משכבו הפכת בחליו:
(ה) אני-אמרתי ה' חנני רפאה נפשי כי-חטאתי לך:
(ו) אויבי יאמרו רע לי מתי ימות ואבד שמו:
(ז) ואם-בא לראות שוא ידבר לבו יקבץ-און לו יצא לחוץ ידבר:
(ח) יחד עלי יתלחשו כל-שנאי עלי יחשבו רעה לי:
(ט) דבר-בליעל יצוק בו ואשר שכב לא-יוסיף לקום:
(י) גם איש-שלומי אשר-בטחתי בו אוכל לחמי הגדיל עלי עקב:
(יא) ואתה ה' חנני והקימני ואשלמה להם:
(יב) בזאת ידעתי כי-חפצת בי כי לא-יריע איבי עלי:
(יג) ואני בתמי תמכת בי ותציבני לפניך לעולם:
(יד) ברוך ה' אלהי ישראל מהעולם ועד העולם אמן ואמן:

פרק מ"ב
(א) למנצח משכיל לבני-קרח:
(ב) כאיל תערג על-אפיקי-מים כן נפשי תערג אליך אלהים:
(ג) צמאה נפשי לאלהים לאל חי מתי אבוא ואראה פני אלהים:
(ד) היתה-לי דמעתי לחם יומם ולילה באמר אלי כל-היום איה אלהיך:
(ה) אלה אזכרה ואשפכה עלי נפשי כי אעבר בסך אדדם עד-בית אלהים בקול-רנה ותודה המון חוגג:
(ו) מה-תשתוחחי נפשי ותהמי עלי הוחילי לאלהים כי-עוד אודנו ישועות פניו:
