(א) למנצח מזמור לדוד:
(ב) יענך ה' ביום צרה ישגבך שם אלהי יעקב:
(ג) ישלח עזרך מקדש ומציון יסעדך:
(ד) יזכר כל-מנחתיך ועולתך ידשנה סלה:
(ה) יתן-לך כלבבך וכל-עצתך ימלא:
(ו) נרננה בישועתך ובשם-אלהינו נדגל ימלא ה' כל-משאלותיך:
(ז) עתה ידעתי כי הושיע ה' משיחו יענהו משמי קדשו בגבורות ישע ימינו:
(ח) אלה ברכב ואלה בסוסים ואנחנו בשם-ה' אלהינו נזכיר:
(ט) המה כרעו ונפלו ואנחנו קמנו ונתעודד:
(י) ה' הושיעה המלך יעננו ביום-קראנו:

פרק כ"א
(א) למנצח מזמור לדוד:
(ב) ה' בעזך ישמח-מלך ובישועתך מה-יגל מאד:
(ג) תאות לבו נתתה לו וארשת שפתיו בל-מנעת סלה:
(ד) כי-תקדמנו ברכות טוב תשית לראשו עטרת פז:
(ה) חיים שאל ממך נתתה לו ארך ימים עולם ועד:
(ו) גדול כבודו בישועתך הוד והדר תשוה עליו:
(ז) כי-תשיתהו ברכות לעד תחדהו בשמחה את-פניך:
(ח) כי-המלך בטח בה' ובחסד עליון בל-ימוט:
(ט) תמצא ידך לכל-איביך ימינך תמצא שנאיך:
(י) תשיתמו כתנור אש לעת פניך ה' באפו יבלעם ותאכלם אש:
(יא) פרימו מארץ תאבד וזרעם מבני אדם:
(יב) כי-נטו עליך רעה חשבו מזמה בל-יוכלו:
(יג) כי-תשיתמו שכם במיתריך תכונן על-פניהם:
(יד) רומה ה' בעזך נשירה ונזמרה גבורתך:

פרק כ"ב
(א) למנצח על-אילת השחר מזמור לדוד:
(ב) אלי אלי למה עזבתני רחוק מישועתי דברי שאגתי:
(ג) אלהי אקרא יומם ולא תענה ולילה ולא-דומיה לי:
(ד) ואתה קדוש יושב תהלות ישראל:
(ה) בך בטחו אבתינו בטחו ותפלטמו:
(ו) אליך זעקו ונמלטו בך בטחו ולא-בושו:
(ז) ואנכי תולעת ולא-איש חרפת אדם ובזוי עם:
(ח) כל-ראי ילעגו לי יפטירו בשפה יניעו ראש:
(ט) גל אל-ה' יפלטהו יצילהו כי חפץ בו:
(י) כי-אתה גחי מבטן מבטיחי על-שדי אמי:
(יא) עליך השלכתי מרחם מבטן אמי אלי אתה:
(יב) אל-תרחק ממני כי-צרה קרובה כי אין עוזר:
(יג) סבבוני פרים רבים אבירי בשן כתרוני:
(יד) פצו עלי פיהם אריה טרף ושאג:
(טו) כמים נשפכתי והתפרדו כל-עצמותי היה לבי כדונג נמס בתוך מעי:
(טז) יבש כחרש כחי ולשוני מדבק מלקוחי ולעפר-מות תשפתני:
(יז) כי-סבבוני כלבים עדת מרעים הקיפוני כארי ידי ורגלי:
(יח) אספר כל-עצמותי המה יביטו יראו-בי:
(יט) יחלקו בגדי להם ועל-לבושי יפילו גורל:
(כ) ואתה ה' אל-תרחק אילותי לעזרתי חושה:
(כא) הצילה מחרב נפשי מיד-כלב יחידתי:
(כב) הושיעני מפי אריה ומקרני רמים עניתני:
(כג) אספרה שמך לאחי בתוך קהל אהללך:
(כד) יראי ה' הללוהו כל-זרע יעקב כבדוהו וגורו ממנו כל-זרע ישראל:
(כה) כי לא-בזה ולא שקץ ענות עני ולא-הסתיר פניו ממנו ובשועו אליו שמע:
(כו) מאתך תהלתי בקהל רב נדרי אשלם נגד יראיו:
(כז) יאכלו ענוים וישבעו יהללו ה' דרשיו יחי לבבכם לעד:
(כח) יזכרו וישבו אל-ה' כל-אפסי-ארץ וישתחוו לפניך כל-משפחות גוים:
(כט) כי לה' המלוכה ומושל בגוים:
(ל) אכלו וישתחוו כל-דשני-ארץ לפניו יכרעו כל-יורדי עפר ונפשו לא חיה:
(לא) זרע יעבדנו יספר לאדני לדור:
(לב) יבאו ויגידו צדקתו לעם נולד כי עשה:

פרק כ"ג
(א) מזמור לדוד ה' רעי לא אחסר:
(ב) בנאות דשא ירביצני על-מי מנחות ינהלני:
(ג) נפשי ישובב ינחני במעגלי-צדק למען שמו:
(ד) גם כי-אלך בגיא צלמות לא-אירא רע כי-אתה עמדי שבטך ומשענתך המה ינחמני:
(ה) תערך לפני שלחן נגד צררי דשנת בשמן ראשי כוסי רויה:
(ו) אך טוב וחסד ירדפוני כל-ימי חיי ושבתי בבית-ה' לארך ימים:

פרק כ"ד
(א) לדוד מזמור לה' הארץ ומלואה תבל וישבי בה:
(ב) כי הוא על-ימים יסדה ועל-נהרות יכוננה:
(ג) מי-יעלה בהר ה' ומי-יקום במקום קדשו:
(ד) נקי כפים ובר לבב אשר לא-נשא לשוא נפשי ולא נשבע למרמה:
(ה) ישא ברכה מאת ה' וצדקה מאלהי ישעו:
