(ה) אם-גמלתי שולמי רע ואחלצה צוררי ריקם:
(ו) ירדף אויב נפשי וישג וירמס לארץ חיי וכבודי לעפר ישכן סלה:
(ז) קומה ה' באפך הנשא בעברות צוררי ועורה אלי משפט צוית:
(ח) ועדת לאמים תסובבך ועליה למרום שובה:
(ט) ה' ידין עמים שפטני ה' כצדקי וכתמי עלי:
(י) יגמר-נא רע רשעים ותכונן צדיק ובחן לבות וכליות אלהים צדיק:
(יא) מגני על-אלהים מושיע ישרי-לב:
(יב) אלהים שופט צדיק ואל זעם בכל-יום:
(יג) אם-לא ישוב חרבו ילטוש קשתו דרך ויכוננה:
(יד) ולו הכין כלי-מות חציו לדלקים יפעל:
(טו) הנה יחבל-און והרה עמל וילד שקר:
(טז) בור כרה ויחפרהו ויפל בשחת יפעל:
(יז) ישוב עמלו בראשו ועל-קדקדו חמסו ירד:
(יח) אודה ה' כצדקו ואזמרה שם-ה' עליון:

פרק ח'
(א) למנצח על-הגתית מזמור לדוד:
(ב) ה' אדנינו מה-אדיר שמך בכל-הארץ אשר-תנה הודך על-השמים:
(ג) מפי עוללים וינקים יסדת עז למען צורריך להשבית אויב ומתנקם:
(ד) כי-אראה שמיך מעשה אצבעתיך ירח וכוכבים אשר כוננתה:
(ה) מה-אנוש כי-תזכרנו ובן-אדם כי תפקדנו:
(ו) ותחסרהו מעט מאלהים וכבוד והדר תעטרהו:
(ז) תמשילהו במעשי ידיך כל שתה תחת-רגליו:
(ח) צנה ואלפים כלם וגם בהמות שדי:
(ט) צפור שמים ודגי הים עבר ארחות ימים:
(י) ה' אדנינו מה-אדיר שמך בכל-הארץ:

פרק ט'
(א) למנצח על מות לבן מזמור לדוד:
(ב) אודה ה' בכל-לבי אספרה כל-נפלאותיך:
(ג) אשמחה ואעלצה בך אזמרה שמך עליון:
(ד) בשוב-אויבי אחור יכשלו ויאבדו מפניך:
(ה) כי-עשית משפטי ודיני ישבת לכסא שופט צדק:
(ו) גערת גוים אבדת רשע שמם מחית לעולם ועד:
(ז) האויב תמו חרבות לנצח וערים נתשת אבד זכרם המה:
(ח) וה' לעולם ישב כונן למשפט כסאו:
(ט) והוא ישפט-תבל בצדק ידין לאמים במישרים:
(י) ויהי ה' משגב לדך משגב לעתות בצרה:
(יא) ויבטחו בך יודעי שמך כי לא-עזבת דרשיך ה':
(יב) זמרו לה' ישב ציון הגידו בעמים עלילותיו:
(יג) כי-דרש דמים אותם זכר לא-שכח צעקת ענוים:
(יד) חננני ה' ראה עניי משנאי מרוממי משערי מות:
(טו) למען אספרה כל-תהלתיך בשערי בת-ציון אגילה בישועתך:
(טז) טבעו גוים בשחת עשו ברשת-זו טמנו נלכדה רגלם:
(יז) נודע ה' משפט עשה בפעל כפיו נוקש רשע הגיון סלה:
(יח) ישובו רשעים לשאולה כל-גוים שכחי אלהים:
(יט) כי לא לנצח ישכח אביון תקות עניים תאבד לעד:
(כ) קומה ה' אל-יעז אנוש ישפטו גוים על-פניך:
(כא) שיתה ה' מורה להם ידעו גוים אנוש המה סלה:

פרק י'
(א) למה ה' תעמד ברחוק תעלים לעתות בצרה:
(ב) בגאות-רשע ידלק עני יתפשו במזמות זו חשבו:
(ג) כי-הלל רשע על-תאות נפשו ובצע ברך נאץ ה':
(ד) רשע כגבה אפו בל-ידרש אין אלהים כל-מזמותיו:
(ה) יחילו דרכיו בכל-עת מרום משפטיך מנגדו כל-צורריו יפיח בהם:
(ו) אמר בלבו בל-אמוט לדר ודר אשר לא-ברע:
(ז) אלה פיהו מלא ומרמות ותך תחת לשונו עמל ואון:
(ח) ישב במארב חצרים במסתרים יהרג נקי עיניו לחלכה יצפנו:
(ט) יארב במסתר כאריה בסכה יארב לחטוף עני יחטף עני במשכו ברשתו:
(י) ידכה ישח ונפל בעצומיו חיל כאים :
(יא) אמר בלבו שכח אל הסתיר פניו בל-ראה לנצח:
(יב) קומה ה' אל נשא ידך אל-תשכח ענוים:
(יג) על-מה נאץ רשע אלהים אמר בלבו לא תדרש:
(יד) ראתה כי-אתה עמל וכעס תביט לתת בידך עליך יעזב חלכה יתום אתה היית עוזר:
(טו) שבר זרוע רשע ורע תדרוש-רשעו בל-תמצא:
(טז) ה' מלך עולם ועד אבדו גוים מארצו:
(יז) תאות ענוים שמעת ה' תכין לבם תקשיב אזנך:
(יח) לשפט יתום ודך בל-יוסיף עוד לערץ אנוש מן-הארץ:

פרק י"א
(א) למנצח לדוד בה' חסיתי איך תאמרו לנפשי נודי הרכם צפור:
(ב) כי הנה הרשעים ידרכון קשת כוננו חצם על-יתר לירות במו-אפל לישרי-לב:
