ספר תהילים

פרק א'
(א) אשרי האיש אשר לא הלך בעצת רשעים ובדרך חטאים לא עמד ובמושב לצים לא ישב:
(ב) כי אם-בתורת ה' חפצו ובתורתו יהגה יומם ולילה:
(ג) והיה כעץ שתול על-פלגי מים אשר פריו יתן בעתו ועלהו לא יבול וכל אשר-יעשה יצליח:
(ד) לא-כן הרשעים כי אם-כמץ אשר-תדפנו רוח:
(ה) על-כן לא-יקמו רשעים במשפט וחטאים בעדת צדיקים:
(ו) כי-יודע ה' דרך צדיקים ודרך רשעים תאבד:

פרק ב'
(א) למה רגשו גוים ולאמים יהגו-ריק:
(ב) יתיצבו מלכי-ארץ ורוזנים נוסדו-יחד על-ה' ועל-משיחו:
(ג) ננתקה את-מוסרותימו ונשליכה ממנו עבתימו:
(ד) יושב בשמים ישחק אדני ילעג-למו:
(ה) אז ידבר אלימו באפו ובחרונו יבהלמו:
(ו) ואני נסכתי מלכי על-ציון הר-קדשי:
(ז) אספרה אל חק ה' אמר אלי בני אתה אני היום ילדתיך:
(ח) שאל ממני ואתנה גוים נחלתך ואחזתך אפסי-ארץ:
(ט) תרעם בשבט ברזל ככלי יוצר תנפצם:
(י) ועתה מלכים השכילו הוסרו שפטי ארץ:
(יא) עבדו את-ה' ביראה וגילו ברעדה:
(יב) נשקו-בר פן-יאנף ותאבדו דרך כי-יבער כמעט אפו אשרי כל-חוסי בו:

פרק ג'
(א) מזמור לדוד בברחו מפני אבשלום בנו:
(ב) ה' מה-רבו צרי רבים קמים עלי:
(ג) רבים אמרים לנפשי אין ישועתה לו באלהים סלה:
(ד) ואתה ה' מגן בעדי כבודי ומרים ראשי:
(ה) קולי אל-ה' אקרא ויענני מהר קדשו סלה:
(ו) אני שכבתי ואישנה הקיצותי כי ה' יסמכני:
(ז) לא-אירא מרבבות עם אשר סביב שתו עלי:
(ח) קומה ה' הושיעני אלהי כי-הכית את-כל-איבי לחי שני רשעים שברת:
(ט) לה' הישועה על-עמך ברכתך סלה:

פרק ד'
(א) למנצח בנגינות מזמור לדוד:
(ב) בקראי ענני אלהי צדקי בצר הרחבת לי חנני ושמע תפלתי:
(ג) בני-איש עד-מה כבודי לכלמה תאהבון ריק תבקשו כזב סלה:
(ד) ודעו כי-הפלה ה' חסיד לו ה' ישמע בקראי אליו:
(ה) רגזו ואל-תחטאו אמרו בלבבכם על-משכבכם ודמו סלה:
(ו) זבחו זבחי-צדק ובטחו אל-ה':
(ז) רבים אמרים מי-יראנו טוב נסה-עלינו אור פניך ה':
(ח) נתתה שמחה בלבי מעת דגנם ותירושם רבו:
(ט) בשלום יחדו אשכבה ואישן כי-אתה ה' לבדד לבטח תושיבני:

פרק ה'
(א) למנצח אל-הנחילות מזמור לדוד:
(ב) אמרי האזינה ה' בינה הגיגי:
(ג) הקשיבה לקול שועי מלכי ואלהי כי-אליך אתפלל:
(ד) ה' בקר תשמע קולי בקר אערך-לך ואצפה:
(ה) כי לא אל חפץ רשע אתה לא יגרך רע:
(ו) לא-יתיצבו הוללים לנגד עיניך שנאת כל-פעלי און:
(ז) תאבד דברי כזב איש-דמים ומרמה יתעב ה':
(ח) ואני ברב חסדך אבוא ביתך אשתחוה אל-היכל קדשך ביראתך:
(ט) ה' נחני בצדקתך למען שוררי הישר לפני דרכך:
(י) כי אין בפיהו נכונה קרבם הוות קבר-פתוח גרונם לשונם יחליקון:
(יא) האשימם אלהים יפלו ממעצותיהם ברב פשעיהם הדיחמו כי מרו בך:
(יב) וישמחו כל-חוסי בך לעולם ירננו ותסך עלימו ויעלצו בך אהבי שמך:
(יג) כי-אתה תברך צדיק ה' כצנה רצון תעטרנו:

פרק ו'
(א) למנצח בנגינות על-השמינית מזמור לדוד:
(ב) ה' אל-באפך תוכיחני ואל-בחמתך תיסרני:
(ג) חנני ה' כי אמלל אני רפאני ה' כי נבהלו עצמי:
(ד) ונפשי נבהלה מאד ואתה ה' עד-מתי:
(ה) שובה ה' חלצה נפשי הושיעני למען חסדך:
(ו) כי אין במות זכרך בשאול מי יודה-לך:
(ז) יגעתי באנחתי אשחה בכל-לילה מטתי בדמעתי ערשי אמסה:
(ח) עששה מכעס עיני עתקה בכל-צוררי:
(ט) סורו ממני כל-פעלי און כי-שמע ה' קול בכיי:
(י) שמע ה' תחנתי ה' תפלתי יקח:
(יא) יבשו ויבהלו מאד כל-איבי ישבו יבשו רגע:

פרק ז'
(א) שגיון לדוד אשר-שר לה' על-דברי-כוש בן-ימיני:
(ב) ה' אלהי בך חסיתי הושיעני מכל-רדפי והצילני:
(ג) פן-יטרף כאריה נפשי פרק ואין מציל:
(ד) ה' אלהי אם-עשיתי זאת אם-יש-עול בכפי:
