﻿לְדָוִד, אֵלֶיךָ ייי נַפְשִׁי אֶשָּׂא. אֱ~לֹהַי בְּךָ בָטַחְתִּי אַל אֵבוֹשָׁה אַל יַעַלְצוּ אוֹיְבַי לִי גַּם כָּל קֹוֶיךָ לֹא יֵבֹשׁוּ. יֵבֹשׁוּ הַבּוֹגְדִים רֵיקָם דְּרָכֶיךָ ייי הוֹדִיעֵנִי אֹרְחוֹתֶיךָ לַמְּדֵנִי הַדְרִיכֵנִי בַאֲמִתֶּךָ וְלַמְּדֵנִי כִּי אַתָּה אֱ~לֹהֵי יִשְׁעִי אוֹתְךָ קִוִּיתִי כָּל הַיּוֹם זְכֹר רַחֲמֶיךָ ייי וַחֲסָדֶיךָ כִּי מֵעוֹלָם הֵמָּה חַטֹּאות נְעוּרַי וּפְשָׁעַי אַל תִּזְכֹּר כְּחַסְדְּךָ זְכָר לִי אַתָּה לְמַעַן טוּבְךָ ייי טוֹב וְיָשָׁר ייי עַל כֵּן יוֹרֶה חַטָּאִים בַּדָּרֶךְ יַדְרֵךְ עֲנָוִים בַּמִּשְׁפָּט וִילַמֵּד עֲנָוִים דַּרְכּוֹ כָּל אָרְחוֹת ייי חֶסֶד וֶאֱמֶת לְנֹצְרֵי בְרִיתוֹ וְעֵדֹתָיו לְמַעַן שִׁמְךָ ייי וְסָלַחְתָּ לַעֲוֺנִי כִּי רַב הוּא מִי זֶה הָאִישׁ יְרֵא ייי יוֹרֶנּוּ בְּדֶרֶךְ יִבְחָר נַפְשׁוֹ בְּטוֹב תָּלִין וְזַרְעוֹ יִירַשׁ אָרֶץ סוֹד ייי לִירֵאָיו וּבְרִיתוֹ לְהוֹדִיעָם עֵינַי תָּמִיד אֶל ייי כִּי הוּא יוֹצִיא מֵרֶשֶׁת רַגְלָי פְּנֵה אֵלַי וְחָנֵּנִי כִּי יָחִיד וְעָנִי אָנִי צָרוֹת לְבָבִי הִרְחִיבוּ מִמְּצוּקוֹתַי הוֹצִיאֵנִי רְאֵה עָנְיִי וַעֲמָלִי וְשָׂא לְכָל חַטֹּאותָי רְאֵה אֹיְבַי כִּי רָבּוּ וְשִׂנְאַת חָמָס שְׂנֵאוּנִי שָׁמְרָה נַפְשִׁי וְהַצִּילֵנִי אַל אֵבוֹשׁ כִּי חָסִיתִי בָךְ תֹּם וָיֹשֶׁר יִצְּרוּנִי כִּי קִוִּיתִיךָ פְּדֵה אֱ~לֹהִים אֶת יִשְׂרָאֵל מִכֹּל צָרוֹתָיו׃